تاج من جديد..

تاج جديد من محمد النقيب

هابدأ بالسؤال الرابع علشان جاوبت أول 3 أسئلة قبل كدة

الرابع: هل فكرت فى إغلاق المدونة .. و السبب ؟

لأ مفكرتش اقفلها قبل كدة.. بس كتير بفكر معاها باللا جدوي

الخامس: صورتك فى المدونة.. رمزيتها ؟

مفيش صورة خالص..

السادس: طبيعة كتابتك فى المدونة بشكل عام.. سياسة.. قصة.. عبث.. كلام فاضى ؟

عبث ..كلام فاضي أحيانا وأحيانا كلام عاجبني لشعراء أو كتاب..

السابع: لماذا تدون أصلا ؟

علي سبيل ازعاج الآخرين ..

الثامن: أحلى جملة قيلت لك فى وصف مدونتك ؟

هي مش أحلي جملة بالضبط ..هو أول وأطرف تعليق عن اسم المدونة :).... ((اسم تنح أوي!!!)) ده كان من محمد أخويا ...وتنح في لغة محمد يعني سخيف ...صدمته في الاسم قلت نوعا لما شرحتله مغزي الاسم وقصيدة محمود درويش اللي اقتبسته منها... وبعدها بشهرين تقريبا كان رأيه الجديد ((تصدقي انه اسم جامد...)) طبعا ده علشان أنا ماتريقش علي مدونته اللي مسميها عطشان!!!

التاسع: التعليقات بالنسبة لك.. أهميتها ؟

وسيلة التواصل ..آراء وأفكار مختلفة وعيون تانية بتشوف بيها.. ساعات التعليقات بتكون أهم من البوست نفسه..

العاشر: أفضل مدونة قرأتها.. يمكن اختيار عدة مدونات

مش مهم تكون أفضل ..المهم تكون أحب ليا...هما حوالي 8 مدونات لازم أعدي عليهم أول ما ادخل وباحب أتابع جديدهم دايما...

الحادى عشر: حد قل أدبه فى التعليق.. إيه رد فعلك ؟

لأ محصلش
تحديث::: بالصدفة في نفس وقت البوست ده لقيت رد عندي بلغة مش فاهماها خمنت إنها اسباني أو ايطالي ولقيته من ولد مكسيكي عنده 16 سنة ..خليت أختي تترجملي اللي مكتوب علشان الاسباني تخصصها ..قالتلي انه كان بيسأل دي مدونة شعر ولا أيه وبيقولي عندك تعليقات وبيشتم في وسط كلامه مش عارفة ليه... ضحكت وقلتها مش مشكلة ده واحد صغير وبيلعب وخلاص لكن هيا صممت اننا نرد عليه في مدونته وقالتله -علي لساني يعني- أنا كمان ممكن أشتمك بلغتك وممكن اشتمك بلغتي لكن أنا مش هاعمل كدة:)
المهم إني لقيته رجع تاني رد وبعد الترجمة عرفت أنه بيقول إن فيه سوء تفاهم وإنهم بيستخدموا الكلمات دي عادي عندهم في المكسيك وانه كان نفسه يشوف شكل مدونة شبه مدونته بالعربي وبالصدفة دي كانت مدونتي..المهم إني قررت اني هاسيب تعليقاته لانه مش قاصد يشتم أولا ولأنها مش هتضايق حد هنا بلغتها دي
:)
الثانى عشر: أسوأ مدونة الاجابة اجبارية يمكن اختيار عدة مدونات هما كتير اصلا ؟أسوأ مدون مهو هتجاوب هتجاوب؟أسوأ بوست؟

أسوأ مدونة كتدوين ممكن تكون مدونتي علشان أنا مش بادون بمعني التدوين وعاملاها
سبيس تقريبا... بس بمعني السؤال مش عارفة أوي لأني غالبا لما بادخل بلوج ومتعجبنيش بانساها لأنها معلمتش معايا بحاجة كويسة.. وأسوأ بوستات بالنسبة ليا هي البوستات المبتذلة لمجرد الابتذال..

الثالث عشر: إيه اللى هيحصل لايميلك لما تموت ؟

مش هاتفرق ..أنا كدة كدة بافتحه كل فين وفين ..مش هيزعل عليا يعني علشان سوء
المعاملة دي..

الرابع عشر: إديت الباسوورد لحد قبل كده ؟

آه طبعا..

الخامس عشر: اسمك ؟
إيمان..

السادس عشر: اسم الدلع المشهور وسط أصحابك ؟

صحابي القريبين أوي يعرفوا إيما ..اللي هوا اسمي العائلي اللي مش بيتعرض للتلوث الخارجي.. موني كمان اسم قديم عزيز عليا...غير كدة غالبا إيمي أو إيمو أو مُنة

السابع عشر: عمرك ؟


هأتم 23 سنة في شهر 8 إن شاء الله

الثامن عشر: برجك ؟

العذراء .. وفي الأبراج الصينية مش عارفة.. تقريبا الفيل أو الدب أو الحصان حاجة كدة
..
التاسع عشر: مجال دراستك ؟

طب بشري..

العشرون: شخصيتك نوعها إيه ؟
سؤال صعب مش عارفة اجابته .. شخصية مملة طبعا بعد الاجابات الهايلة دي..

الحادى و العشرون: السفر بالنسبة لك إيه ؟

ضغط نفسي وتوتر في أوله علشان أنا من الناس اللي بترتبط بالأماكن جدا بس بالتعود بيبقي مناظر جديدة وناس جديدة ..عموما أنا مسافرتش كتير..
الثانى و العشرون: المود بتاعك ؟
حاليا تحت الصفر ..

الثالث و العشرون: وقت فراغك بتعمل فيه إيه ؟

المفروض إن معنديش وقت فراغ خالص في ظروف الدراسة الحالية.. لكن باعمل كل اللي
ممكن يتعمل في وقت الفراغ حتي لو معنديش وقت..
الرابع و العشرون: الأكلة المفضلة ؟

الفواكه أكلي المفضل .. بس فيه حاجات تانية كتير بحبها.. الكشري والبطاطس المحمرة والسمك مثلا..

الخامس و العشرون: الصفات اللى خدتها من بابا ؟

السادس و العشرون: الصفات اللى خدتها من ماما ؟

هأجاوب السؤالين مع بعض علشان ماما وبابا شبه بعض في الصفات ...طبقا لنظرياتي في الحياة أي اتنين متجوزين بيبقوا شبه بعض في الصفات والكلام وحتي الشكل بعد كام سنة ..ما علينا مش وقت النظريات .. بابا وماما طيبين جدا وخدومين جدا وده أتمني أورث منهم نصه حتي... ومن بابا خدت الطول:)

السابع و العشرون: أكتر ست حاجات بتحبها ؟

أهلي وصحابي اللي هما أحلي حاجة في الدنيا.. جدتي الله يرحمها .. القصص والشعر..
الشاي والخشاف بتاع رمضان .. لما أشوف حد مبسوط ..

الثامن و العشرون: أكتر ست حاجات بتكرهها ؟

الظلم ..النفاق.. الغرور .. أنا لما بيكون عندي امتحانات. . مش عارفة بقي هو لازم ست حاجات !!

التاسع و العشرون: الشغل بالنسبة لك ؟

تجربة لسة معيشتهاش ..تبدأ من السنة الجاية إن شاء الله...

الثلاثون: إيه الكمبيوتر و الإنترنت بالنسبة لك ؟

عالم ساحر جميل كان غريب جدا عليا إني ارتبط بيه كدة ....مصدر للاكتئاب أحيانا وعلاج ليه في نفس الوقت

الحادى و الثلاثون: أمررهم لمين ؟

لأي حد لسة مجاوبش أسئلته يتفضله وربنا معاه ..

زائر ..لا يجيء

لكل تلك الأشياء البعيدة... الجميلة.....لأنها لا تجئ

الزائر الذي لم يجيء

..ومرّ المساء

وكاد يغيب جبين القمر

وكدنا نشّيع ساعات أمسية ثانيه

ونشهد كيف تسير السعادة للهاويه

ولم تأت أنت

..وضعت مع الأمنيات الأخر

وابقيت كرسّيك الخاليا

يشاغل مجلسنا الذاويا

ويبقى يضجّ ويسأل عن زائر لم يجيء

***

وما كنت أعلم أنّك إن غبت خلف السنين

تخلّف ظلّك في كلّ لفظ وفي كلّ معنى

وفي كلّ زاوية من رؤاي وفي كلّ محنى

وما كنت أعلم أنّك أقوى من الحاضرين

وأنّ مئات من الزائرين

يضيعون في لحظة من حنين

يمدّ ويجزر شوقا إلى زائر لم يجيء

***

ولو كنت جئت..وكنا جلسنا مع الآخرين

ودار الحديث دوائر وانشعب الأصدقاء

أما كنت تصبح كالحاضرين

وكان المساء يمرّ ونحن نقّلب أعيننا حائرين

ونسأل حتى فراغ الكراسي

عن الغائبين وراء الأماسي

ونصرخ أنّ لنا بينهم زائرا لم يجيء ؟

***

ولو جئت يوما – وما زلت أوثر ألا تجيء-

لجفّ عبير الفراغ الملوّن في ذكرياتي

وقصّ جناح التخيّل واكتأبت أغنياتي

وأمسكت في راحتيّ حطام رجائي البريء

وأدركت أنّي أحبّك حلما

وما دمت قد جئت لحما وعظما

سأحلم بالزائر المستحيل الذي لم يجيء

الزائرالذي لم يجيء ..نازك الملائكة..الراحلة الرقيقة التي أسرت أرواحنا بكلماتها..اللهم اغفر لها وارحمها واسكنها الجنة

ألف ليلة

خيول بيضاء ساحرة تجر وراءها عربة نحو عوالم الخيال الساحر في ألف ليلة وليلة..هذا ما كانت ترسمه هذه الأغنية بلحنها الساحر وصوت صاحبها الذي يحبه الصغار ربما أكثر من الكبار..و الذي اتخذه برنامج رمضاني اسمه (قطايف) كتتر لنهايتها لتبدأ بعدها مباشرة ألف ليلة وليلة ..
ومازلت أعشق الأغنية وترتبط في خيالي دوما بسحر عالم ألف ليلة وليلة وبسحر ذكريات الطفولة ..