الواجب من سؤال واحد..اذكر ستة أسرار قد لا يكتشفها من يحدثك لأول مرة..
1
اللثغة.. حرف الراء عندي واقع شوية :) ..ودايما مش عارفة ليه محدش بياخد باله في أول مرة ..طبعا ده مش سر بس دايما بيتكرر الموقف المضحك إني أكون باكلم واحدة كلمتها كذا مرة قبل كدة وفجأة تقاطع الكلام وتسأل باستغراب :إيه ده هو إنتي لدغة؟!!
2
أنا عسراء..استخدم يدي اليسري في الكتابة... ده كمان مش سر لكن من الحاجات اللي محدش بيكتشفها من أول مرة !
3
باتكلم كتير جدا عن اللازم و نصف كلامي علي الأقل لمجرد إني أنفي تهمة الخجل / الضيق /الكبر دايما الناس بتتخيل إن السكوت معناه حاجة من الحاجات دي ..لكن مع كل الرغي ده أعلي ما ف صوتي سكوتي
4
باحتفظ بانفعلاتي لنفسي و مبتسمة غالبا مع إن حاجات بسيطة جدا ممكن تضايقني
5
غريبة .. وخيالية.. ومجنونة أحيانا كمان
6
انطباعي عن الأشخاص من أول تعامل بيكون صحيح بدرجة كبيرة وباعرف أفهم كويس كمان مشاعر و نفسية اللي باتعامل معاهم..
خلاص كدة :)
آخر حاجة إني أمرر الواجب ل 6 مدونين ماتمررش ليهم قبل كدة
منيرفا.. أرض الغجر
محمد ..النقيب هدوء
دافنشي ..فنان فقير
أحمد رشاد.. عزيز المصري
فوءة .. رأيي
إيمان.. من أجل الحب
علياء..من علي صليب يهوذا
11 comments:
حمدالله علي السلامة ياشيخه
انتِ تلميذة فاشلة تماما
وعاوزة الضرب
افتحي ايديكي يابنت
شطورة يا كتوره
وحشاني :)
الله يسلمك يا جميلة
بس مليش دعوة أنا عايزة نجمة في الواجب بتاعي
ميرسي يا جومانتي
سلام عليكم .. أنا بحسك على فكرة على السر السادس دا .. أنا دايما بتخدع بعيد عنك .. ممكن آخد عندك درس؟
سلام عليكم
أولا: شكرا على التمرير.. الواجب اتعمل.. واتصحح.. عارفة طبعا..!
ملاحظة رخمة:
هو ممكن اللي يحدثك أول مرة ما ياخدش باله من اللثغة؟
2:
ما أفتكرش.. لا.. مش بتتكلمي كتير.. يعني حتى الكلمتين اللي بتتكلميهم معتبراهم كتير!!
6:
جميلة هذه الثقة.. أنا أغبطك!
طحياطي
اختى العزيزة ايما
ازيك ايه اخبارك ؟
اتمنى اشوفك قريب ده اولا
اما ثانيا فاسرارك حلوة مكنتش اعرفها برضه وانا اعسر زيك
الواجب ده جالى برضه هعمله قريب باذن الله
انا حقولك كام حاجة بس علشان بقالى كتير مش بكتب ولا برد
لما يبقى إنتى عندك لدغة يبقى انا عندى ايه ..سوبر لدغة
عسراء!
هو دا حاجة مهمة اوى الناس تعرفها يعنى انا ابقى اكتب عضمة كوعى بتطلع فوق و بقلب صباعى لورا :s
رغاية بس قولى ... ولا بلاش
غريبة و خيالية و احياناً مجنونة
امال انا ابقى ايه !
ايما هانم هنا
يعني يصح كده ياهانم اعرف مدونتك بالصدفة من اللف في المدونات
وانا اللي كونت فاكراكي حبيبة قلبي
طلعتي خاينه عاااااااااااااا
موش هاسامحك عاااااااااا
بس اسرارك دي توحفة
وخصوصا اني عرفت اني رغاية كتير يعني
مممممم
طيب سيادتك بعد اذنك شرفي ايميلي وضيفيني
fatimah-1983@hotmail.com
عزيز
وعليكم السلام ورحمة الله وبركاته
تتخدع ليه بس!!مش عارفة هي حاجة فطرية مش حاجة مكتسبة بيتهيألي
وبعدين الأساتذة مينفعش ياخدوا دروس
طبعا يا فندم :)
دافنشي
عفوا يا فندم..طبعا عارفة:)
بالنسبة للملاحظة..احم ..تخيل !!بيحصل والله وبيتكرر كمان ..اسأل طيب منيرفا مخدتش بالها غير في تالت مرة نتقابل فيها!!
وباتكلم كتير صدقني ..أكتر من اللازم علي الأقل وساعات من غير ما يكون لازم أصلا :)
وبالنسبة للثقة فيا رب تكون في محلها:) بس انا باحس كدة فعلا!
محمد
أزيك يا بشمهندس :)؟؟يا رب تكون بخير أنا بعتالك سلام كتير اوي اوي مع محمد يا رب يكون وصله ومطلعش ندل زي عادته أنت عارفه طبعا :)
أنا كمان أتمني أشوفك قريب وأباركلك بنفسي كمان إن شاءالله
أكيد أسرارك هتكون أجمل يا محمد :) زي روحك بالظبط يعني
أنت كمان أعسر !!أخوات طبعا :)
هاستني أسرارك قريب بقي
أشوفك علي خير قريب يا رب
:)
عطشان
تقولي كام حاجة عشان بقالك كتير مبتردش!! وليه الكرم الزيادة ده!!
أولا مش باحس إنك ألدغ يعني بس غالبا وارثها شوية..
وبعدين محدش قال حاجة مهمة أو لأ ..محدش بيعرف إني عسراء من أول مرة وبعدين أكتب عن كل مواهب السيرك بتاعتك طبعا :)
أمال إنت تبقي أيه؟؟تبقي أخويا الظريف طبعا!!
يلا العب بعيد شوية مش عايزة دوشة
فاطمة
من أجل عينيك الجميلة هنا !!..نورتي المدونة يا بنوتة:)
إزاي بس يا بطوطة أنا رديت من الاكونت بتاعي ده عندك أكتر من مرة والله
هاضيفك فورا يا فندم ونرغي براحتنا :)
ميرسي على الواجب بس أنا مش هعرف احله يا ميس عشان انا معتقدش اللي بيقابلني أوي مرة بيعرف حاجة أصلاً غير الحاجات الطبيعية المعتادة
بالمناسبة أنا اللي بيقابلني اول مرة مبيعرفش أنا أيمن ولا أيسر لأني بستخدم الاتنين زي بعض ما عدا في الكتابة بفضل اليمنى ولو اني ساعات بكتب باليسرى :)
محمد
كدة يا بشمهندس هتسيب الواجب المتأخر كدة !!ههههه
طيب عموما أديك قلت سر من الأسرار ..بتكتب بإيديك الاتنين!! عقدونا بقي!!
:)
طيب عامة هاسامحك في الواجب عشان بس نورت المدونة بعد الغياب الطويل ده
ويا رب تكون بخير دايما
:)
اعتقد انك نسيتى سر كبير ماحدش بيحس بيه غير لما بيعرفك اكتر!!
ان فيه جاذبية فظيعة اقوى من النغناطيس بتشد ليكى الناس من اول مرة (بس الواحد ما بيبقاش عارف انه بيتشد من اول مرة )
:)
انا بلعن عن السر السابع اللى يمكن خجلك و تواضعك يمنعك تقوليه
Post a Comment