رجع القمر ...؟
و لا ضلله الطريق ؟
حسيت بضيق ...
لما بصرى انجلى ...
شفت الضلام حق وحقيق
زاد الوله ....
و الشوق حريق ....
يا صحبة الأيام أفتونى فى الهوى
و اوصفوا للجى إزاى القلب ضل
و القمر عمره ما طل على ليالى غربتى ...
قولوا لإبنى ان ما لحقتش أعلمه
العدل هو المسأله ...
مش الطلوع ...
و الحِب ما بيعرفش جوع ...
و السعادة و الدموع ...
تعنى الحياة ...
و الموت عمره ما كان المعضله ....
يا صحبة الأيام
لا تنسوا سحنتى ...
و لا تنسوا لمسة حنانى على الكتاف ...
قولوا للجاهل خطوتى ...: " كان ضعيف .. لكنه أبدا و لا ليلة خاف ..."
ورددوا فى قبضة السكتة القويه غنوتى ....
قولوا كان يعرف يقول حرفين لطاف ...
لكنهم عارفين يشاروا على النمرده
بلا تردد أو ارتجاف ...
افشوا سرى .. قولوا كان بينسج الأحلام بشر ...
بلا طلاسم أو جلا ...
******
من صغر سنى ...
وأنا بحلم بالسما ونجومها
يبقوا لينا صحاب ...
و القمر فى حلمى عمره ما خانّا
و لا مرة غاب ...
من صغر سنى و أنا قلبى زي كتاب ...
مفتوح لكل من يريد ...
وكلامه توت
كل المواسم موسمه .. يانع و طاب
و حنانى بيت مالوهش باب ...
وكبرت ملامحي بقيت شباب ...
وعشقت مية من الحسان ...
وعرفت يعنى إيه طعم الجنان ...
و صاحبت الحرامى و الشريف ....
و قابلت ليل شكله مخيف ...
و قابلت فجر من الأمان ...
كاشفت ناسك ألعبان ...
و عرفت مجرم بس دايب فى الإيمان ...
و العمر جرح ... اليوم نزيف ....
الشعر شاب ....
لكن يا صحبة الطريق ....
رغم المشاوير العصيبه
فى بحار الدنيا و فى صحارى العمر الطويل
روحى ما طلعتش من بيضة الطفولة ....!
******
يا صحبة الطريق ....
عارفنى ؟
عارفين اسمى ؟
رسمى ... نبرتى ؟
مش عارف ليه ... عيونكم ما بتعكسش صورتى ؟
ولسانكم ما بيردش سلامي ...
هو أنا طيف ولا انتم مجرد خدعه من خيال ؟
يعنى ضيعت دموعى على حزنكم هدر ...
و فرحتى لبسمة الرضا على شفايف حلمكم .. كانت سراب ؟
و لا أنا الى مش موجود ....؟
ها...
موجود؟
القصيدة للشاعر المبدع محمد عثمان جبريل ..
9 comments:
مختفية بقالك فترة و مش بنسمع عنك اخبار ليه
ان شاء الله تكوني بخير
كالعادة و زي كل مرة اخياراتك رائعة يا ايما
تحياتي لكي
لا يا يوسف دي مش اي اختيارات علي فكرة
والله من اول سطر قلت ها ..! صيحة اندهاش
يعني انا اديلك لينك المدونة تقومي تعمليها من ورايا
بس انا فرحانه استاذنا رائع وشعره لا جدال عليه
بجد تسلم ايديكِ يا ايما بجد انتِ لا تعوضي ..
:)
يوسف
مش مختفية ولا حاجة أنا موجودة أهو !!
ربنا يكرمك يا يوسف ويا رب تكون بخير أنت كمان:)
وكالعادة أنا كمان شكرا علي رأيك بترفع من روحي المعدنية والله يا يوسف :)
جومانا
يا بنتي أنا مش مختاراها قدامك ومستأذنة أديبناإني انشرها هنا !!
فعلا يا جومانتي شعره رائع وطبعا شكرا كبيرة أوي ليكي يا جميلتي عشان انتي اللي عرفتيني علي العالم الجميل بتاعه
:)
عزيزتى
سبقت المعرفة التعارف
ولكنه تعارف ترسخ هنا
في زيارتى الأولى أسجل اعجابي بما قرأت من كلمات تتوسد الأمنيات وترتحل في لجتها الذهبية ...كما أسجل اعجابي بالشاعر الذي خطت أستجابت أنامله لصوت قلب فنان فأبدع ...
خالص مودتى
والى لقاء
إذيك يا دكتوره
أخبارك إيه ?
يارب تكونى بخير
وحشتنى أوى المدونة
طبعا إختيار جميل جدا كعادتك دائما
إستمتعت بشده بالقصيده
وإستمتعت أكتر بعودتي مرة أخري لمكان أنا بحبه جدا
خالص تحياتي أهديها لكي علي حسن أختيارك
وأتمنى إنك تشرفينى ف مدونتي
وسلام
د.سامح
أهلا يا دكتور نورت المدونة وبلوجر كله بزيارتك :)
أكيد طبعا سبقت المعرفة وأتمني تكمل بالتعارف قريب جدا إن شاء الله بالذات إني مش واثقة جومانا وصلتلك مبروك كبيرة جدا جدا زي ما قلتلها ولا لأ وعايزة أقولها أنا بنفسي :)
عموما فرصة عشان وجودك هنا أقولك ألف ألف مبروك ربنا يسعد أيامكم كلها ويحفظكم لبعض يا رب
شكرا علي وجودك ويا رب تنور المدونة دايما :)
Bedo pasha
أنا كويسة الحمد لله :)
يا رب تكون أنت كمان بخير بعد الغيبة التدوينية الطويلة كلها!!
شكرا علي زيارتك وعلي سؤالك وأكيد هتلاقيني موجودة في مدونتك أنا زرتها أكتر من مرة الفترة اللي فاتت بس مكنش فيه جديد
أهلا بيك في عالم التدوين مرة تانية :)
تحفة فعلا يا ايما
انا مش مستغربة لانى دايما بلاقي عندك اجمل مما بتوقع
رونة
خمنت إنها هتعجبك لو دخلتي :) أنا عارفة إن ذوقنا أكيد قريب أوي
نورتي المدونة اللي بقالك كتير مختفية عنها وطبعا مش هاقولك شكرا يا رونة إنتي عارفة من غير ما أقول أي حاجة
:)
Post a Comment