تاج يبدأ من هناااااك...

كان فيه حاجات كتيرة عايزة أعملها أو أكتبها هنا في الأجازة المزعومة بتاعتي دي بس واضح إن الوقت المكهرب مش هيسمحلي بكتير .. علي العموم أول حاجة كان لازم أعملها هوا تاج من دافنشي ولأنه تاج مختلف فعلا أجلته عشان أجاوبه بروقان

لما بتشوف واحدة جميلة قوي بتشيل عينك بعد قد إيه؟

بشيل عيني علي طول عشان أنا مش باحب أطول بعيني علي حد لإنها عادة سخيفة وبتحرج الشخص ..لو جذابة أوي كدة (بمقاييسي أنا يعني ) ممكن أتأملها مرة تانية لما تبعد شوية عشان مكونش باضايقها ..


لو لك 3 أمنيات هيتحققوا.. هيكونوا إيه؟ (بس حاجة خاصة بك أنت)؟

أمنيات ؟؟ امممم...ساعات بيبقي علي بالي 100 حاجة وساعات زي دلوقتي كدة مش في عقلي حاجة معينة.. كان فيه 3 أحلام ناس حلمتلي بيهم من فترة وحكولي عنهم أتمني انهم يتحققوا اتنين منهم بخصوص الدراسة والتخرج وكدة ..

آخر مرة بكيت؟
آخر مرة بكيت بكاء حقيقي كان من حوالي 8 شهور .. وآخر مرة مبتسرة كان من شهر تقريبا..

إيه أكتر حاجة بتحبها في نفسك؟
:)

مش عارفة ليه لما شفت السؤال ده افتكرت مشهد في مسرحية كارمن ..لما كانت بطلة العرض (سيمون )بتحاول تقول للمخرج (محمد صبحي ) أكتر صفة عاجباها فيه ومكنش سايبها تقول وتقريبا قال كل الصفات الكويسة في الدنيا عن نفسه...رغم إن ده مشهد كوميدي في مسرحية بس بيتهيألي ان الحقيقة دايما إننا بنفترض في نفسنا صفات مثالية كتير الله أعلم موجودة ولا في خيالنا وبس.. طيب بصراحة مش عارفة أجاوب .. يعني مثلا حاجة باحبها بس مش لازم تكون أكتر إني غالبا مش سهل أيأس ودايما عندي أمل في كل حاجة إنها تبقي أحسن مهما كانت صورتها قاتمة..

أكتر حاجة بقى بتكرهها في نفسك؟

التردد ..أكتر حاجة مزعجة في الدنيا .. القلق والخوف .. هما أصلا مش طبعي بس لما يبقي في ظروف تخليني أقلق بتبقي أكتر حاجة باكرهها في الدنيا .. وحاجات تانية أكيد بس مش فاكرة دلوقت ..

أسوأ حاجة عملتها؟
أسوأ حاجة عملتها !! مش عارفة !!سؤال غريب شوية !!

مبادئك.. ثابت عليها؟

آه .. أو اللي متأكدة منه إني بأحاول أكون ثابتة عليها علي قد ما أقدر..

لو رجع الزمن بيك مين الشخص اللي تختاره أنك متقابلوش؟

مفيش .. ماقبلتش حد وحش أوي لدرجة إني أتمني ما أقابلوش ..ويا رب ما أقبلش حد كدة..

لأي مدى ممكن تضحي ؟
هوا سهل إني أقول لآخر مدي لإني باتكلم .. بس أتمني يكون ده الواقع فعلا لو حصل موقف يستحق التضحية ..

بتبكي من غير سبب؟

غالبا لأ لأني مش بأعرف أبكي كويس أصلا ..(البكاءُ لا يتّسعُ لدمعي ) زي ما بتقول سوزان عليوان .. بس البكاء (لجوة) ممكن ..ساعات ممكن تكون أسباب مش واضحة أو تجميع لأسباب تانية سابقة ..

أنت قوي؟ (في تصنيفك لنفسك )؟

آه .. حتي في أوقات الضعف الكتيرة ربنا بيقويني دايما عشان كدة ممكن أعتبرني قوية ..

وبس كدة...
هأمرره لمنيرفا مبدأيا ويا رب تبطل كسل وتجاوبه هوا والتاج التاني ..أعتقد دافنشي مرره لكل الناس بس تأكيدا يعني كل اللي يعدي هنا وموصلش ليه يتفضله طبعا..
:) شكرا يا فنان