الليل..وآخره

ليلاتي في المعاد ده...
ينعاد عمري اللي عدى

والقى الماضي اللي عدى
ع الحاضر يستعدى

والحزن في قلبي ناخره
والريح ناح فوق سطوحي

ويا بوي عالليل وآخره
لما تصحى جروحي

أدعي لله تعالى
يطفى شوقى وحنيني

يا فجر يا جاي تعالى
زيح حمل تقيل حانيني

ليضيع كنزي اللي داخره
ونوحي يا روحي نوحي

ويابوي عالليل وآخره
لما تصحى جروحي

الليل وآخره...سيد حجاب

تساؤلات

تسألني الصغيرة عن غاية الفرح الإنساني فأجيب.. هو أن يدخل أحدهم إلي عالمك تاركا وشما جميلا مميزا بقسمات وجهه علي جنبات روحك..تسألني عن قمة الحزن الإنساني فأجيب ..هو أن يرحل أحدهم بعد أن يترك وشمه علي روحك تاركا لك الاختيار بين الاحتراق بالكي في محاولات النسيان أو الاحتراق بنار الذكري ..

تاج

التاج ده وصلني من دافنشي (فنان فقير)

أحب شخص لقلبك في الدنيا؟
ماما....
إنسان مستعد تضحي بحياتك – ركز فى كلمة حياتك - عشانه؟
لو تضحية زي دي ممكنة..كتير يستحقوها..ببساطة كل اللي وجودهم في حياتي بيصنعها يستحقوها..
إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
مفيش..مكرهتش حد قبل كده و اتمنيت موته أبدا..باستثناء شارون قبل ما يحصله اللي حصله..أنك تقتل حد وتقف تبص لجثته ده إحساس مرضي ربنا يعافينا منه..
ما هو:اسم أجمل كتاب كتبه بشر قرأته ومحتفظ به حتى الان؟
ما أقدرش أختار كتاب واحد ..مينفعش أجمل كتاب لكل كاتب؟؟ علي العموم معظم كتيبات د.أحمد خالد توفيق .. أعمال أمل دنقل الكاملة.. سلامتك من الآه لعبد الوهاب مطاوع.. الجنس التالت ليوسف إدريس.. بين يدي عمر ورجال حول الرسول لخالد محمد خالد... عودة الروح لتوفيق الحكيم.. الهزيمة كان اسمها فاطمة لإحسان عبد القدوس بس ده مش محتفظة بيه..في حاجات أجمل بس ناسياها..علي العموم كفاية
اسم كتاب - كتبه بشر برضه - انت متعلق بيه وبتقرأه كل فترة؟
أي حاجة لد.أحمد خالد توفيق ..ممكن أفتح أي قصة وعلي أي صفحة من الوسط وأعيش معاه وأنسي الدنيا.. كمان لا تصالح ومعظم أشعار أمل دنقل .. كل الأشعار اللي باحبها عموما..
أهم جهاز منزلى أنت متعلق بيه أو بتستخدمه كتير؟
البوتاجاز...
مكان تحس بالراحة عندما تدخله؟
مصلي السيدات بمسجد النور
شيء تحس بالراحة النفسية عندما تنظر إليه؟
عينين حد مبسوط وبيضحك من قلبه بالذات الأطفال.. الزرع عموما
مكان تحس فيه بالحنين الى شيء لا تدرى ماهو و ذكريات جارفة الى لاشيء؟
مدرستي بكل ذكرياتها الجميلة.. شوارع وسط البلد علشان بتفكرني بأصحابي كلهم..
اجمل مدينة زرتها داخل مصر ؟
للأسف مسافرتش لمدن كتير في مصر بس باحب مرسي مطروح لأنها أكتر مدينة زرتها يمكن..
أجمل مكان طبيعي رأيته داخل مصر ؟
النيل في أسوان..لسة مشفتوش علشان عمري ما زرت أسوان بس باشوفه في خيالي جميل جدا
شخصية كارتونية بتحبها؟
رشيدة معزة بكار !! سندباد بتاع د.مني أبو النصر..
نوع هاتفك المحمول؟
نوكيا 6070
سرعة بروسيسور جهازك؟
إحم.. البروسيسور ده اللي هوا مين وبيعمل أيه بالضبط؟؟ مش عارفة تقريبا الرقم ده 2.80
حجم ذاكرة –هارد- جهازك؟
80
المساحة التى تشغلها المواد الاسلامية على جهازك؟
21.6 GB بس ده مش المقياس أصلا ..المهم تكون حاجات بتستفيد منها....
نفس المساحة السالف ذكرها فى قلبك -الإجابة لنفسك عشان الرياء يا اخواننا -؟
مش عارفة ..يا رب يملي الهارد كله
أهم هدف انت واضعه لحياتك الآن؟
أخلص السنة دي كليتي وأعرف هاعمل أيه بعد كدة..


مواصفات فتى (فتاة) الأحلام بالنسبة لك؟
مش عارفة.. ماحاولتش ارسم ملامح شخصيته بالورقة والقلم ولا حسيت إنها مناقصة باختار فيها مواصفات.. مواصفاته هاعرفها لما أعرفه ..ممكن أقول حاجات كتير بس كلها في الآخر مجرد كلمات ..الخلق والدين حاجة أساسية علشان اللي عنده أخلاق أكيد روحه وصفاته كلها جميلة.. أتمني تكون روحه جميلة ومتسامح مع الدنيا كلها..

صف ما يأتى:شعورك لما بتسمع كلمة مصر ؟
قلبي بيوجعني عليها ..ببساطة زي ما بيقول سيد حجاب :باحلم يا صاحبي وأنا لسة باحبي بدنيا تانية ومصر جنة يا صاحبي...

شعورك لما بتسمع كلام عن اليهود؟
باحس بالذل اللي عايشه كل واحد عربي بسببهم أو الحقيقة بسببنا..يهود إسرائيل تحديدا..
شعورك لما بتشوف ظابط شرطة؟
باحس إنهم لغوا انسانيتهم قبل ما يتخرجوا..أكيد مش كلهم مجرمين بس اللي بيعملوه في الناس خلي كل واحد يكره يشوفهم
شعورك لما بتشوف الكناس العجوز فى الطريق؟
باحس بحزن لإنه كبير وبيتعب علشان يقدر يعيش في الوقت اللي المفروض يرتاح فيه ..مش الكناس بالذات لإن دي مهنة زيها زي أي عمل بس أي حد كبير عموما بيشتغل شغل مجهد علشان محتاج..
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
باحترمه أكيد علشان هوا نيته إنه يتقرب لربنا ويرضيه بالذات لو كمان بشوش ومبتسم ولين مع الناس.. طبعا الجوهر أهم بكتير من الشكل ومش لازم تلبس كدة علشان تكون متدين بس بالتجربة غالبا بيكونوا مهذبين ومحترمين جدا في تعاملهم..
إحساس يراودك فى إشارة مرور مغلقة بسبب مسئول كبير؟
باحس بالقهر.. باتمني يجرب يحس باللي بيعمله في الناس ..
..
هامرره لمنيرفا ومصطفي يحيي..

أيدوم النهر..

لحظة ما بعينها.. لحظة اتزان..لحظة اكتمال ربما ..تتمني لو يهدأ عندها سريانك.. لو يتوقف بك الدهر ها هنا.. لو ترحل عنك حسابات الزمان
لحظة كهذه ستعلمك كم هو قاسٍ أن تحيا قلقا بانتظار لحظات النقصان القادمة ..

أيدوم لنا بستان الزهر
والبيت الهاديء عند النهر
أم يسقط خاتمنا في الماء
ويضيع ويضيع مع التيار
وتفرقنا الأيدي السوداء
ونسير علي طرقات النار
لا نجرؤ تحت سياط القهر
أن نلقي النظرة خلف الزهر
ويغيب النهر..

أيدوم لنا البيت المرح
نتخاصم فيه ونصطلح
دقات الساعة والمجهول
تتباعد عني حين أراك
وأقول لزهر الصيف..أقول
لو ينمو الورد بلا أشواك
ويظل البدر طوال الدهر
لا يكبر عن منتصف الشهر
آه يا زهر..
لو دمت لنا ..
أو دام النهر..

أيدوم النهر...أمل دنقل

زعلانة شوية

إن سألوك الناس عن ضي جوا عيونك مبيلمعش ..متخبيش..
قولهم العيب مش فيا.. دا العيب في الضي..

مسير الضي لوحده هيلمع ... ومسير الضحك لوحده هيرجع..

إن مقدرتش تضحك ..متدمعش ولا تبكيش

باحلم إني ..فنان فقير..فؤاد حداد

فؤاد حداد...........وبس....
يا تري الواحد محتاج يتكلم بعد ما يذكر اسمه .... فؤاد حداد ببساطة....ملك من ملوك الكلام ...
أشعار فؤاد حداد دنيا تانية ..كل ديوان حالة ..وحكاية...
فؤاد حداد.. وقصايده أيام المعتقل وملاحظة الأبنودي العبقرية عنها إنها طولية زي أسياخ شبابيك السجن .. قصايد مليانة أمل رغم الإهانة والتعذيب ..
فؤاد حداد.... (المسحراتي)..
فؤاد حداد ..صاحب أجمل كلمات أغاني.. منير في الجيرة والعشرة.. وهيلا هيلا.... حرما يا سيدي بصوت علي الحجار...فنان فقير بصوت وجيه عزيز....ازرع كل الأرض مقاومة في فيلم العاصفة..
القصيدة اللي في البوست دي مكنتش أعرف عنها حاجة قبل ما أسمع من أخويا عن (نغم مصر)..فرقة من الفرق الغنائية المشهورة ولهم شعبية كبيرة وسط الشباب...وبيغنوا لنجم وبيرم و فؤاد حداد وغيرهم.. كان ليهم موقع علي النت بس للأسف واقع من فترة..
الأغنية كانت أبيات من قصيدة(حلم عبد الله العجوز مع السلطان) ملضومة بأبيات فنان فقير الجميلة...
القصيدة سحرتني لما سمعت الأغنية.. وسحرتني أكتر لما قريتها ..



باحلم اني في اسطمبول
بالعب طاولة مع السلطان
بيحمرق أعمل مش شايف
ويبرّق أعمل مش خايف
والحظ محالف ومخالف
لو أخسر أبقي أنا مسطول
لو أكسب أبقي أنا غلطان

باحلم إني في اسطمبول
بالعب طاولة مع السلطان

كل ما أيده الزهر بتلمس
أحلام عل أنفاسي بتكبس
إنه بيضرب وأنه بيحبس
إشي بالعرض وإشي بالطول
إشي في الفاضي وفي المليان

باحلم إني في اسطمبول
بالعب طاولة مع السلطان

وعيونه بتتمهزأ بيّه
وحواجبه أيضا لعبيه
ودا قاعد فوق الدهبية
وبيستعبط:- مش معقول
وبيضحك زي الإنسان

باحلم إني في اسطمبول
بالعب طاولة مع السلطان

قال والسارق دايما ناكر
والقاتل تلاقيه مش فاكر
كله ورق وفلوس وتذاكر
بيفهمني: العالم غول
وأنا ساكت والدنيا شيطان

باحلم إني في اسطمبول
بالعب طاولة مع السلطان

باحلم أني مؤكد هابكي
ودموعي سالت من شكي
وباقول يمكن وباقول بلكي
أنا باحلم وأنا مش مسئول
الدم بيجري في لبنان

باحلم إني في اسطمبول
بالعب طاولة مع السلطان


فكرت أني أنشرها زي ما هي في الديوان ..كاملة يعني.. لكن لقيت الأحسن أني أكتبها زي ما بيغنوها ..بس زودت عن الأغنية المقطع الأخير من القصيدة لأنه الحقيقة أجمل من أن يترك..

دواير

بنلف فى دواير..
و الدنيا تلف بينا
و دايماً ننتهى

لمطرح ما أبتدينا
طيور العمر تايهة

فى عتمة المدينة

ساكنين فى عالم يعشق الخطر
فيه الطيور تهرب من الشجر

و تهرب النجوم من القمر

بنلف فى دواير
بندور ع الأمان
و نلاقينا نرجعنا
تانى لنفس المكان

ندور ندور

نحلم و نحلم
بالحياة المفرحة
و أتارى أحلامنا
بلا أجنحة..بلا أجنحة

ندور ندور ندور
بجناح حزين مكسور
ساعات نشوف فى العتمة

و ساعات نتوه فى النور

و ساعات عيونا م الأسى ..تفرح

و ساعات فى ساعة الفرح..منوّحة

دواير....الأبنودي...ومروان خوري

لحظات ..شخبطة قديمة

كل شيء هنا

يبدو-بقليل من الواقعية-لحظات..لا أكثر

تكون أو لا تكون...

هذه مشكلتك...وربما مشكلتي..

بك أو من دونك سيواصل رحلته الزمان..

ربما يتبدل في أثوابه الكثيرة..

يتثاقل حينا كعجوز أعيته سنون العمر..

يعدو يوما مثل الفرس اللاهث..

يتلكأ مرة...يركد مرة...يركض مرات..

لكن مهما تغير شكل وحجم الخطوة.

لن يختلف الأمر كثيرا..

عن بضعة لحظات...

الحب أعلي مراحل الاستعمار

الحب هو أعلي مراحل الاستعمار العاطفي!! لأنك حين تحب تستعمرك حبيبتك..وتحتل قلبك وأراضيك وتلغي استقلالك الشخصي.. وتمحو نشيدك الوطني، وتحرمك من حق التمثيل الدبلوماسي المنفرد لدي الأشخاص، والأسر، والأصدقاء..
وهي أيضا حين تحب يستعمرها حبيبها ويشغل قلبها وتفكيرها، ويحرمها من أن يكون لها عالمها الخاص ونشيدها المستقل.. والفارق الوحيد بين استعمار الشعوب واستعمار القلوب هو أن الأخير هو الاستعمار الوحيد الذي لا يكافح أحد لطرده وتحرير"التراب" منه.. بل علي العكس يكون الجهاد"الوطني" فيه لإطالته ومد أجله إلي أقسي حد ممكن.. وعلي حين تحتفل الشعوب بتحررها من الاستعمار ..وتخصص يوما لذلك تسميه"يوم الاستقلال".. تحزن القلوب إذا انتهي استعمارها العاطفي ..وتنكس الرايات ..وتسمي يوم انتهائه بيوم الحزن علي ضياع الحب وافتقاد المشاركة..وعودة الاستقلال..
وفي حين يسلب الاستعمار إرادة الشعوب رغما عنها.. تسلم القلوب إرادتها أو جزءا منها علي الأقل طائعة لمن تحب.. فتختفي الإرادة المستقلة لكل طرف وتحل محلها الإرادة المشتركة.. لدولة الحب "الوحودية" الجديدة..


مقتطف من (الحب أعلي مراحل الاستعمار).. عبد الوهاب مطاوع...من كتاب وقت للسعادة ووقت للبكاء