فؤاد حداد...........وبس....
يا تري الواحد محتاج يتكلم بعد ما يذكر اسمه .... فؤاد حداد ببساطة....ملك من ملوك الكلام ...
أشعار فؤاد حداد دنيا تانية ..كل ديوان حالة ..وحكاية...
فؤاد حداد.. وقصايده أيام المعتقل وملاحظة الأبنودي العبقرية عنها إنها طولية زي أسياخ شبابيك السجن .. قصايد مليانة أمل رغم الإهانة والتعذيب ..
فؤاد حداد.... (المسحراتي)..
فؤاد حداد ..صاحب أجمل كلمات أغاني.. منير في الجيرة والعشرة.. وهيلا هيلا.... حرما يا سيدي بصوت علي الحجار...فنان فقير بصوت وجيه عزيز....ازرع كل الأرض مقاومة في فيلم العاصفة..
القصيدة اللي في البوست دي مكنتش أعرف عنها حاجة قبل ما أسمع من أخويا عن (نغم مصر)..فرقة من الفرق الغنائية المشهورة ولهم شعبية كبيرة وسط الشباب...وبيغنوا لنجم وبيرم و فؤاد حداد وغيرهم.. كان ليهم موقع علي النت بس للأسف واقع من فترة..
الأغنية كانت أبيات من قصيدة(حلم عبد الله العجوز مع السلطان) ملضومة بأبيات فنان فقير الجميلة...
القصيدة سحرتني لما سمعت الأغنية.. وسحرتني أكتر لما قريتها ..
باحلم اني في اسطمبول
بالعب طاولة مع السلطان
بيحمرق أعمل مش شايف
ويبرّق أعمل مش خايف
والحظ محالف ومخالف
لو أخسر أبقي أنا مسطول
لو أكسب أبقي أنا غلطان
باحلم إني في اسطمبول
بالعب طاولة مع السلطان
كل ما أيده الزهر بتلمس
أحلام عل أنفاسي بتكبس
إنه بيضرب وأنه بيحبس
إشي بالعرض وإشي بالطول
إشي في الفاضي وفي المليان
باحلم إني في اسطمبول
بالعب طاولة مع السلطان
وعيونه بتتمهزأ بيّه
وحواجبه أيضا لعبيه
ودا قاعد فوق الدهبية
وبيستعبط:- مش معقول
وبيضحك زي الإنسان
باحلم إني في اسطمبول
بالعب طاولة مع السلطان
قال والسارق دايما ناكر
والقاتل تلاقيه مش فاكر
كله ورق وفلوس وتذاكر
بيفهمني: العالم غول
وأنا ساكت والدنيا شيطان
باحلم إني في اسطمبول
بالعب طاولة مع السلطان
باحلم أني مؤكد هابكي
ودموعي سالت من شكي
وباقول يمكن وباقول بلكي
أنا باحلم وأنا مش مسئول
الدم بيجري في لبنان
باحلم إني في اسطمبول
بالعب طاولة مع السلطان
فكرت أني أنشرها زي ما هي في الديوان ..كاملة يعني.. لكن لقيت الأحسن أني أكتبها زي ما بيغنوها ..بس زودت عن الأغنية المقطع الأخير من القصيدة لأنه الحقيقة أجمل من أن يترك..
8 comments:
الله عليكي يا إيما !
حلو قوي البوست ده.. جمع كل حبايبي!
باعشق فؤاد حداد.. بصراحة مش من زمان.. من ساعة ما بدأت أعماله الكاملة تنزل في هيئة قصور الثقافة..
باعشق منير في الجيرة والعشرة.. وهيلا هيلا.. وحرما يا سيدي بصوت علي الحجار..وطبعا فنان فقير بصوت وجيه عزيز..وازرع كل الأرض مقاومة في فيلم العاصفة..
أقولك كمان؟
الليلة يا سمرة لمنير.. والأحلى بقى: يامصر بصوت حنان ماضي.. روعة بجد..
فرقة نغم مصر دي مش فاكرها.. أكيد من الفرق الكتير الل بيغنوا في الساقية..
ماسمعتش الأغنية دي.. ممكن لو موجوده معاكي أغلس وأطلبها؟
بس غريبة بتقولي انها ملضومة ي قصيدة فنان فقير.. ومالقيتش منها حاجة..
..
إيما..تدوينة روعة :)
أهلا دافنشي
ميرسي جدا بجد..دايما كدة رافع روحي المعنوية ومنور البلوج المهجورة دي..
أنا كمان كان عندي ليه حاجات قليلة قبل ما تنزل أعماله الكاملة وعرفته أكتر منها برضه
الليلة يا سمرة بتاعته؟؟ مكنتش عارفة .. بس كلماتها طبعا محتاجة تكون لعبقري زي حداد.. ولحنها كمان عبقري.. يا مصر دي مسمعتهاش قبل كدة بس هادور عليها..
هما فرقة من المشهورين دلوقتي وبيغنوا في الساقية كتير وفي حفلات SOS كمان .. اللي بيغني اسمه شربيني وعازف الجيتار بتاعهم مشهور جدا اسمه أوسو ..أخويا مدمن جدا لحفلاتهم .. بس الجميل إنهم بيغنوا قصايد ممتعة..لدرجة إنهم بيغنوا قصيدة رائعة لأمل دنقل اسمها أيدوم النهر
الأغنية كانت عندي فيديو متسجلة من حفلة ..بس للأسف راحت في واحدة من وقعات الويندوز الغبية.. وكمان الموقع بتاعهم مقفول من فترة.. بس هأخليه يحاول يجيبها تاني وأبعتهالك إن شاء الله..
هوا بيغني (بأحلم إني..) وفي الوسط أول مقطع من فنان فقير بصوته من غير موسيقي وبعدين يرجع يكملها تاني
..بس فنان فقير أنا مكتبتهاش في البوست علشان يتهيألي أشهر من إني أكتبها!! إن شاء الله أعرف أجيبها وتسمعها أحسن من الوصف العبيط ده..ألف شكر بجد
الرائع فؤاد حداد
ومنير
ووجيه عزيز
ايه يابنتي التدوينة دي؟
زي ما تكوني جمعتي ممثلي الحياة المصرية الأصيلة في مكان واحد
القصيدة جميلة جدا جداوروعتها في انه بيقول كل حاجة في كام كلمة
"الحظ محالف ومخالف"
الله بجد يا حداد
تسلمي ايما على التدوينة الحلوة دي
أهلا ملكة
تسلميلي يا بنوتة علي مرورك وعلي كلامك الجميل ده
معاكي حق والله دول فعلا رمز للأصالة في مصر..فؤاد حداد بجد ملك الكلام الجميل..
البلوج نورت يا جميلة
موقع جديد للشاعر الجميل فؤاد حداد
به تجميع للعديد من نصوص أشعاره
كذلك يمكنك تحميل عدد من أجمل الأغاني الخاصه به
http://www.foadhaddad.somee.com/
و شكرا
موقع جديد للشاعر الجميل فؤاد حداد
به تجميع للعديد من نصوص أشعاره
كذلك يمكنك تحميل عدد من أجمل الأغاني الخاصه به
http://www.foadhaddad.somee.com/
و شكرا
عمنا فؤاد حداد مش عارف اقول عليه ايه غير انه واحد من اشعر الناس ورحمه الله كان مظلوم دايما من الناس والمجنمع وع ذللك مش هتلاقي حد كان بيحب مصر زيه بالرغم ان اصله لبناني ونشكرك علي انك بتنشر عنه مواضيع مدونتيwww.babelkhalk.com وقولة القلوب عند بعضها واصله السما بارضها
فؤاد حداد ....هو : رمضان وسحر السهر والمشربيات القديمة والنيل والقمر وخطوة الولاد للمدارس وحلم بدنيا جديد ومصر عفية وأغنية بيغنيها العمال والصنايعية...اللي زي الشاعر ده مش ممكن يموت لأنه حي في قلوب أحبائه وفي ضمير الوطن .....تحياتي
Post a Comment