يا سكني، كثير من هؤلاء الناس الذين نراهم يمضون من حولنا في نهر الحياة، دهستهم الحياة من قبل مرة أو مرات. لكنهم انتفضوا ليواصلوا المسير . فالحياة طيبة برغم كل شيء ، وبرغم أنها في مثل تلك الحالات تغدو مثقلة بذكري اللحظات الأليمة .. تغدو مفعمة بالشجن.. والشجن حزن جليل. والجلال أعلي مراتب الفتنة..يا سكني...
من قصة "تلك الحياة الفاتنة"....المبدع محمد المخزنجي
14 comments:
جميل اوى المقطع ده
ومدونتك جميله وكويسه
تحياتى ليكى
سلام
جميلة جدا يا دوك .. ذوقك حلو طبعا .. وأكيد دا مش محتاج تأكيد ؟ كفاية ان كلامي بيعجبك .. يبقا اكيد ذوقك حلو ..
مستني اقرا حاجة انتي اللي كاتباها قريب ان شاء الله
تحياتي
السلام عليكم
اختيار رائع
فعلا الحياة مش بتقف عند موقف معين
مدونتك رائع
تحياتي
انالازم اشترى القصه دى
المقطع هايل
واختيارك جميل
تحياتى
محمد جادو
أهلا بيك هنا يا محمد..سعيدة بزيارتك وبرأيك في المدونة..أتمني تعجبك دايما وتتكرر الزيارة:)
تحياتي
شادي
ميرسي يا شادي ربنا يكرمك.. كلامك بيعجبني جدا طبعا أنت عارف رأيي فيه لأنه متميز جدا ومن القلب ..
حاجة أنا اللي كاتباها؟؟ أخاف تغير رأيك ومتجيش تاني هنا:)
ربنا يسهل
تحياتي يا دكتور
بوسي
أهلا بيكي يا بوسي هنا..الحمد لله ان البوست والمدونة عجبوكي.. ميرسي جدا ونورتيني بجد..
سمسم
أهلا بيكي في المدونة يا سمسمة..سعيدة ان المقطع عجبك.. القصة دي من مجموعة"أوتار الماء" المشهورة جدا .. هيا كانت نازلة من مكتبة الأسرة من سنتين أو تلاتة بس عموما معظم كتابات المخزنجي بتكون موجودة في دار الشروق
ان شاء الله هتعجبك جدا
تحياتي
يا ستي انشري ومالكيش دعوة .. بجد هازعل منك
ياه يا إيما..
القصة كانت رهيبة.. المخزنجي بأسلوبه المغرق الذي ينسيك ما حولك وأنت تقرأ.. القصة دي تحديدا كأنها قصيدة بجد..
المقطع ده جميل..باحب جدا تعبير "يا سكني" ده..
بس الحياة مش طيبة برغم كل شيء.. دي حاجة مش قادر أقتنع بيها...
شادي
لأ أوعي تزعل ..حاضر والله أول ما ييجي علي بالي شخبطة هانزلها علي طول ..بس دعواتك علشان اليومين الجايين دول امتحانات أعمال السنة وأكيد انت متخيل الظروف
تحياتي يا شادي ومنور بجد
دافنشي
آه معاك حق القصة فعلا شعر .. كإنها إهداء للمجموعة الساحرة دي...منتهي الرقة والعذوبة..أنا كمان باحب جدا"يا سكني"..وكمان "أيتها المسالمة" إلي بيناديها بيه في أول القصة..
مش طيبة برغم كل شيء طبعا معاك حق أكيد بس يمكن لو حاولناإحنا نكون طيبين برغم كل شيء نشوفها كدة..يمكن علشان هما كدة شايفنها كدة
مش عارفة بجد
تحياتي ومش هاقول منور علشان مش محتاجة أقول طبعا
رائع دايما الراجل ده
ذوقك في اختيار الاقتباسات جميل زيك يا إيما
كل التحية لكِ قبل المخزنجي:)
ملكة
فعلا يا ملوكة المخزنجي فعلا رائع
رغم إني مش عندي ليه حاجات كتير بس اسلوبه مبهر
ميرسي يا جميلة نورتيني
وتحياتي أنا كمان
حاولت أكثر من مرة أن أعلق باستخدام الموبايل أثناء سفري اليومي في الفترة الماضية وكالعادة رفض الدخول بحساب جوجل ,الإقتباس جميل ,يتميز العرب بأنهم يستمتعون بالشجن , إقتباساتك يا إيما جميلة كعادتها ,ولا يمكن لجمال الإقتباس إلا أن يكون إنعكاساً لقبس من روحك ..
تحياتي لك ودمتي سعيدة ومحبوبة ..
محمد النقيب
معلش يا محمد أنا هاحاول أصلح موضوع التعليقات ده
فعلا معاك حق أكيد جزء في شخصيتنا مدمن للشجن
وربنا يكرمك يا رب علي الكلام الرائع والدعوة الأجمل دي ..دمت أنت بألف خير وسعيد ومحبوب دايما يا رب
تحياتي
الله عليكي يا إيمي .... ، هوا أنا ما أجيش عنـدك ... إلا أمـا ألاقي حاجـة حلوة ....
.
.
.
المخزنجي رااائع ، وفي هذا المقطع تحفـة ، ومجموعاته كلـها من أميز المجموعات القصصية على السـاحـة
.
.
خالص تحياااتي ، وآسفين ع التأخـير
إبراهيم
فينك يا فندم مختفي ليه؟؟
وتقفل البلوج كدة وكل ما ادخل مفيش حاجة جديدة:(
ميرسي بجد .. حاجات حلوة بس علشان انتم هنا:)
والمخزنجي رائع طبعا
تحياتي وعود أحمد
:)
Post a Comment